Non me funcionaron os desexos de soños
esta vez. Onde se desenvolveu o principal soño desta noite era, como
case sempre, unha cidade ficticia e non Mondoñedo. Non é que sexa
ficticia de todo senón máis ben unha mestura ficticia de varias
cidades reais.
Si que adormecín pensando en
Cunqueiro, en como xogou coa mitoloxía, en como coa súa
intelixencia e picardía se ría de neno dos maiores da vila
facéndolle bromas constantemente. Unha vez, alguén que todos
coñecedes e que seguro que lle tedes lido moitas cousas, se non
foron novelas foron relatos ou artigos, estaba na Flor na barra
pequena bebendo non me acordo que, quen estaba con el si que sei que
bebía Passportt con laranxa, e víronme facer unha das miñas. Eu
era un neno pequeno pero xa me encantaba sacarlle á xente unhas
risas. Entón armei unha boa. Quen teña algo de relación con Meira
coñece perfectamente a ese veciño terratenente que conseguiu que a
vila medrase cara a Pena en vez de cara Vilardemouros. Tamén se digo
que ten un afán especial pola lectura dos xornais queda aclarado cal
dos dous irmáns Figueroa é. Vale, acabei dicindo Figueroa.
Eu era neno, pero xa plenamente
consciente do afán de Figueroa por ler o periódico de arriba a
abaixo durante horas tomando unicamente un café cortado (o de
fixarme no pouco que consumía é xenética hostaleira). Ben, pois a
historia é que o vin entrar e xa case me escarallo de risa porque
lla tiña ben preparada. Collera un Progreso de había un mes e
puxéralle a portada e outra páxina máis do Progreso do día, pero
o resto todo vello! Deixei ese Progreso “trucado” no final da
barra pequena, enfronte á última banqueta. Daquela na Flor, na
barra pequeniña de abaixo había só catro banquetas fixadas ao
chan, estilo irlandés. O escritor e o compañeiro estaban nos dous
primeiros que daban á barra alta e cando me viron facer a manobra xa
se puxeron á expectativa.
Tal e como se agardaba, Figueroa pediu
o cortado e o Progreso, entón meu pai fíxolle o café e xa lle
sinalou para a barra pequena e alí sentou. Foron uns instantes moi
tensos. Lía a portada con moita calma, mentres remexía o azucre no
cortado. Eu agardaba que non buscase polo número de páxina algunha
noticia en concreto e fose ao medio do xornal, dándose conta ao
momento da xogada. Pero ese non era o estilo Figueroa: el lía todo o
xornal, da primeira á última páxina, por esa orde. Abriu e comezou
a ler. Luís, o do Passport, case o cuspe porque empezou a
escarallarse de risa despois de darlle un trago e ver como Figueroa
pasaba páxina e prendía nas noticias de había un mes sen problema
ningún. Eu, dentro da barra sentado na miña caixa de cervexa, non
puiden aguantar tampouco e erguinme, ríndome até chorar, agarreime
da perna de meu pai e metinme na cociña que non podía máis.
Funcionara á perfección. Logo, cando collín aire, déronme así
algúns remordementos e pensei en irllo dicir e que non seguise
lendo. Rematou o periódico enteiro. Media Flor xa se dera conta da
que armara e había risos por todos lados. Nunca ninguén contou máis
nada disto.
Fóiseme un pouco das mans, ía de
soños isto. Ben, o certo é que soñei con unha cidade na que en
cada barrio grande había como unha zona de clasificación de
residuos e sorprendíame que a xente tiraba cousas como mantas e
colchas, mobles, ou lámpadas que parecían estar ben. Todo estaba
perfectamente clasificado e organizado. Era moi estraño e supuxen
que sería algo así como unhas xornadas da reciclaxe, porque senón
era inexplicable a cantidade de “residuos” que alí había. A
medio percorrer a cidade atopei un coñecido (que en realidade non
coñezo de nada e que era unha mestura, fisicamente, de Woody Allen e
Nyman) que tampouco entendía o desa xestión do lixo. Esa
desconexión espertoume. Dos outros soños non me lembro.
Xa teño contado que un día, o que
despois foi escritor de relatos, oriundo de Ohio, Sherwood Anderson,
colleu e largouse da casa sen avisar durante uns días no que chamou
unha fuxida da súa existencia materialista. Volveu, divorciouse,
cambiouno todo e a partir daquela escribiu. Eu vou facer algo
parecido, pero aviso. Saio mañá.
Comentarios
Publicar un comentario