Esta noite, entendo que polas ganas que
tiña de coller un avión que me levase de novo por aí, soñei con
iso. O estraño era que viña meu pai comigo e incluso me guiaba.
Cando espertei pensei bastante nisto, en facer unha viaxe con meu pai
polos sitios nos que estivo, ir a onde miña nai e el se coñeceron.
Non é nada novo, xa o teño pensado e fareino, pero é a primeira
vez que pensei en facelo indo os dous xuntos.
O aeroporto era moi mal feito pero tiña
de todo. Xusto cando embarcamos avísannos de que teñen que facer un
cambio urxente dunha peza dese avión e que resulta máis rápido
cambiala que mudarnos a todos de avión, polo que piden se alguén se
ofrece para axudar a empuxar a peza desde o almacén de onde hai que
traela. Alí saímos varias persoas do avión e atópome con algún
excompañeiro de traballo. Conseguimos axudar a facer a montaxe e
volvemos para embarcar de novo. Nese momento eu despisteime porque
todo o aeroporto eran escaleiras mecánicas moi altas, de até 6
alturas, e ían a moita velocidade, co que non era fácil coller as
que che correspondían. Unha vez que cheguei á altura que me tocaba
empecei a correr e tiven que pasar polo medio dunha gran tenda de
froitas. Non era algo estraño, xa que en cada altura do aeroporto
había xigantescas tendas nas que si ou si tiñas que pasar polo
medio e cada tenda era dun produto específico. Nese atallo pola
tenda de froitas polo que eu pasaba correndo vin como a unha das
dependentas lle caía un melón branco, do que eu non daba apartado,
dándolle unha forte patada. Quedou medio mazado, entón deume
vergoña e collino para levalo e fun pagalo. Na caixa, un rapaz moi
simpático díxome que non me sentise obrigado, pero que era un melón
moi bo e que se quería desfrutalo como se debía que era mellor que
me levase unha confeitura especial dos que tiñan variedade. Escollín o
de froitos do bosque. Cando fun pagar leveime a sorpresa de que eran
3 euros do melón e 21 do botiño de confeitura. A miña reacción foi
dicir que me acababa de dar conta de que non levaba cartos, que me
quedara a carteira no avión porque baixáramos correndo varios
pasaxeiros a axudar con un problema nunha peza do avión. Pola cara
do dependente parecía non resultar moi crible o meu argumento, polo
que o solucionei espertando.
Despois fiei varios soños dos que de
dous polo menos non me lembro, pero si que me lembro doutros dous
deles e que vou poñer moi breves porque non me apetece desenvolvelos
porque, polo menos un deles, teñen detrás unha carga de lembranzas
e filosofía moi grandes.
Este que digo que é moi forte é está
baseado nunha carreira que, basicamente, consiste en atravesar unha
cidade a través de diferentes probas. As probas comezan con cousas
de correr, saber por onde ir, recoller sinais, pero van pasando a ter
que ir escorréndose por un sumidoiro, subir case escalando un
edificio... Chegábase a un punto de controlo no que avaliaban eses
resultados nas probas e logo analizábanche o corpo, facíanche
preguntas concretas sobre que viras na cidade e iso tamén puntuaba
ao final. Nesa carreira os que competiamos eramos amigos, xente que
nos queremos moi ben, había moito detrás. En cine ou literatura é
moi complicado describir e mostrar ese tipo de cousas, algo que non
está á miña altura, polo que queda no aire.
O último dos soños foi acompañando á
miña xefa en varios locais e espazos onde fixemos ou se estaban a
facer traballos de deseño e integración no espazo. Ao ir pola rúa, como ela
era unha persoa moi querida, todo o mundo a ía felicitando e
dándolle as grazas xa que foi das persoas pioneiras en promover a
accesibilidade total para todxs.
Comentarios
Publicar un comentario