Ultimamente
estame pasando algo cos soños que normalmente non me pasaba, e é
que se me arrexuntan tanto que esquezo moitísimas partes e só me
esperto lembrándome un pouco do argumento central.
O
mércores movín eu só todo o que tiñamos nun conxelador cara
outro, para deixalo baleiro e limpalo, e onte proceso inverso para
deixar todo no conxelador limpo (e despois limpar o que queda
baleiro). Ocupoume practicamente as dúas mañás porque son aínda
ben quilos. Teño moitas maniotas nos brazos e creo que iso influíu
en que un dos soños que tiven fose sobre unha preparación para unha
viaxe a recunchos perdidos de Asia que iamos facer un grupo de amigos
xunto a xente que coñeceriamos na preparación, que duraba uns días.
Teño dor nos antebrazos aínda agora, facendo a forza de teclear.
Non me apetece escribir. O soño veu bastante ao caso. Neses
adestramentos tiñamos tamén unha parte vinculada a saber
relacionarse e a manter a calma en momentos de tensión, semellante a
estas novas “atraccións” que están agora moi de moda, das que
falamos onte mentres tomabamos algo e probabamos as tapas de concurso
de Meira. Son unha especie de casas pechadas onde tés que ir facendo
probas de intelixencia e coordinación entre membros dun grupo ou
parella para conseguir que se abra a saída. Agora lembro tamén que
o destino seguramente fose Asia porque hai uns días estiven vendo
con un amigo fotos e vídeos da viaxe que fixo a andar de mochileiros
coa súa panda polo interior do Xapón. Todo vai cadrando.
Antes
de coller o avión paramos nun posto de venda de cousas usadas:
libros, fotos, paraugas, roupa, elementos de adorno, de cociña.
Había de todo. Gustábanme moitas das cousas pero non podía levalas porque ía co sitio xusto. Aínda así quixen coller un par de libros,
unha pulseira de coiro e unha especie de navalla multiusos coa
bandeira da URSS. Xa estaban agardando por min para facer o embarque
e fun algo con présa. Non tiña a carteira coa documentación.
Perdéraa ao pagar no posto aquel. Fun até alí e tíñanma gardada.
Espertei con tranquilidade.
Comentarios
Publicar un comentario